Një dron ushtarak amerikan pa pilot u godit nga një avion luftarak rus në hapësirën ajrore ndërkombëtare mbi Detin e Zi, thanë Forcat Ajrore të SHBA.
Incidenti ndodhi sot në orën 06:03 GMT, kur dy avionë rusë, tip Su-27 “kryen një përgjim të pasigurt dhe joprofesional” të dronit të vëzhgimit MQ-9, thuhet në një deklaratë të Forcave Ajrore të SHBA në Evropë.
“Një nga dy avionët rusë goditi një helikë të dronit”, shtohet në deklaratë.
“Disa herë para përplasjes, Su-27 hodhi karburant dhe fluturoi përpara MQ-9 në një mënyrë të pamatur, të pasigurt për mjedisin dhe joprofesionale”, vazhdon ajo.
Forcat amerikane e rrëzuan dronin mbi ujërat ndërkombëtare.
“Aeroplani ynë MQ-9 po kryente operacione rutinë në hapësirën ajrore ndërkombëtare kur u kap dhe u godit nga një avion rus, duke rezultuar në një përplasje dhe humbje të plotë të MQ-9”, tha gjenerali i Forcave Ajrore, James B. Hecker, i cili është komandant i Forcave Ajrore të SHBA-së në Evropë dhe Forcave Ajrore në Afrikë.
“Në fakt, ky akt i pasigurt dhe joprofesional i rusëve për pak sa nuk shkaktoi rrëzimin e të dy avionëve. Avionët e SHBA dhe aleatët do të vazhdojnë të operojnë në hapësirën ajrore ndërkombëtare dhe ne u bëjmë thirrje rusëve të sillen në mënyrë profesionale dhe të sigurt”, tha Hecker në deklaratë./ atsh
