Federata e Futbollit e Kosovës ka ndarë çmimin e lojtari më të mirë për xhiron e 27 të Superligës së Kosovës. Ky çmim i ka takuar futbollistit të FC Prishtina, Bujar Pllana.
Komisioni njëzëri vlerësoi se lojtari i Prishtinës, Bujar Pllana ishte më i miri i kësaj jave. Ai përveç se shënoi dy gola, kontribuoi edhe me një asist në fitoren që bardhekaltrit e realizuan kundër Trepçës’89 (4:1). Ai po ashtu u vlerësua edhe për paraqitjen e mirë në mbrojtje, ku nuk pati asnjë gabim.
Pllana u shpreh i lumtur për çmimin e fituar, por theksoi se në këtë edicion rëndësi kanë pikët për skuadrën, në mënyrë që sa më herët ta sigurojë mbetjen në Superligë.
“Është nder dhe kënaqësi që të shpallesh më i miri i xhiros në Albi Mall Superligë. Ky çmim nuk do të ishte i mundur pa ndihmën e bashkëlojtarëve dhe trajnerëve, andaj i falenderoj shumë për mbështetjen. Kemi arritur t’i marrim 3 pikë shumë të rëndësishme për ecurinë e mëtutjeshme të kampionatit, duke synuar daljen në Evropë nga vendi i tretë. Atmosfera në ekip është shumë e mirë dhe shpresojmë që të vazhdojmë me këtë ritëm dhe të arrijmë objektivin e klubit, daljen në Evropë”, ka theksuar Pllana për faqen zyrtare të FFK-së pas marrjes së çmimit.
/TV Malisheva
