Kryetari i Nismës Socialdemokrate, Fatmir Limaj në emisionin “Debat” të RTK-së ka rrëfyer përvojën e tij të ballafaqimit me drejtësinë ndërkombëtare në Hagë. Në 15 vjetorin e shpalljes së tij të pafajshëm nga Tribunali i Hagës, Limaj ka folur gjerësisht për 33 muajt e qëndrimit i paraburgosur në Sheviningën të Holandës. “Nga Pogdorica Carla del Ponte e ka bërë të ditur aktakuzën ndaj meje kur unë isha në Slloveni. Dhe pas dy javësh me kanë dërguar në Sheviningen. 33 muaj kam qëndruar atje”, ka thënë ai. Në një përmbledhje të shfaqur nga RTK-ja para emisionit ku shfaqeshin momente që nga lirimi dhe arrritja në shtëpi, Limaj ka kujtuar Hajredin Balën, i akuzuar bashkë më të në Hagë dhe i cili nuk jeton më. Po ashtu Limaj i ka kujtuar edhe prindërit e tij dhe gruan që nuk jetojnë më dhe të afërmit e tij që u shfaqën në video. “Haga ishte krijuar për krimet serbe që ishin kryer në Bosnje, Kroaci… Ne e kemi parë si krijesë të tillë të gjykimit të krimeve serbe. Dhe pastaj lufta në Kosovë dhe në përcepcionin tonë ishte se kjo gjykatë ishte për krimet serbe dhe krimet e Millosheviqit. Kur ka dalë aktakuza ndaj meje unë kam qenë i befasuar, kam qenë i befasuar edhe se si po gjykohën shqiptarët”, ka thënë Limaj. Ai tutje ka thënë se ata nuk i kanë ikur drejtësisë pasi që e kanë ditur se janë të pafajshëm dhe se nuk kishin çfarë të fshehin nga e kaluara e tyre. “Gjykata e përcakton a jeni apo nuk jeni fajtor, edhe pse ishte padrejtësi ndaj neve. Situata ishte fragjile në Kosovë aso kohe, pavarësia ishte larg. Brenga ime ishte qe njerëzit ta pranojnë me qetësi këtë vendim. Është e papërshkrueshme të jesh në burg me ata që i kanë vra 4000-5000 njerëz, me njerëz që ishin të dënuar për gjenocid, me gjeneralët serbë, si Kërstiq, etj”, tha Limaj. “Dhe të futesh në atë ambient, është e vështirë emocionalisht, por në këto situata duhesh të kesh besim në Zot dhe në drejtësi dhe duhet të ballafaqohesh me atë deri në aktin final”. Limaj më pas ka treguar se me kë kishte qëndruar në burgun e Sheviningenit. “Një vit qëndrova me shefin e UDB-së, me Ivica Stanishiqin. Aty kishte edhe kroatë, serbë dhe boshnjakë. Një kat më poshtë ishte Millosheviqi, Shesheli po ashtu ishte aty. Me një pjesë kemi bërë jetë të përbashkët, ata ishin të akuzuar për krime në Kosovë dhe në Bosnje”, ka rrëfyer Limaj. “Kemi pas rastin të bashkëbisedojmë me ta për një vit, shumë tema, si para luftës, pas luftës. S’kemi pranu me fol me Millosheviqin, edhe pse ai tentonte të fliste. Shesheli ishte po i njëjti, si në Beograd, i tillë ka mbet edhe aty”. Limaj e ka quajtur fat për Kosovën dhe për të trupin gjykues në Tribunalin e Hagës. “Është fat kur keni një gjykatë serioze, sepse të jep siguri dhe ndjehesh mirë. Ndjehesh mirë kur ke trup gjykues që është tepër profesional. Aty ka pasur gjyqtarë që nuk kanë mundur të ndikohen nga jashtë. Gjyqtarë që s’kanë lejuar asgjë që është shfaq e që nuk në ligj, në procedurë dhe e kanë udhëheqë atë proces me profesionalizëm të pashoq”, ka thënë ai.
Limaj thotë nuk ka shans me u mbyll Gjykata Speciale pa hetuar krimet serbe në Kosovë Kryetari i Nismës Socialdemokrate, Fatmir Limaj, ka thënë se Kosova duhet ta ngrit zërin, sepse nuk ka asnjë shanse me u mbyllë Gjykata e Hagës pa u hetuar çdo masakër që është bërë në Kosovë, vetëm nëse ne si shoqëri nuk dojmë me u angazhu në funksion të kësaj. Ai ka thënë se do të jetë zëdhënës i kësaj teme. “Përgjegjës i politikave të RTS-së në kohën luftë ka qenë Aleksandër Vucic, sepse ka prodhuar lajme false dhe ka nxitur urrejtje, kriminelët i ka nxjerrë dhe po vazhdon ti nxjerrë si heronj. Pra, zëdhënësit i këtij televizioni famëkeq është President, zëdhënësit i Lirisë është në Hagë. Jakup Krasniqi i ka shërbye një politike, zëdhënës i një populli çlirimtar që ka dashur vetëm lirinë, ndërsa Vucic e Dacic kanë qenë zëdhënës të krimit e gjenocidit ndaj shqiptarëve”, ka thënë Limaj në RTK. Më tutje, ai ka thënë se është krenar për periudhën që ka kaluar me ata njerëz që sot janë në Hagë dhe bashkë me ta jemi krenar me luftën e Ushtrisë Çlirimtare të Kosovën. Sipas tij, sa herë që jemi bërë bashkë ka fitu Kosova.
